Опуштениот амбиент што го нуди хотелот и езерската околина околу него, како и вистинското пролетно време тоа утро, во 8:30 часот ги отвори вратите за 90-те учесници кои дојдоа од сите краишта на државата.
Идејата на настанот беше на нашите посетители да им се претстават програмските технологии кои многумина веке ги запознаа на ГЕД ланската година во Скопје но, овојпат, од технички видик. Програмата на семинарот беше обемна, а малите технички потешкотии што ги имавме на почетокот и во текот на семинарот само ни го отежнаа ритамот по кој се редеа презентациите и дополнително ни го „скратија“ времето што ни беше дадено на располагање. Сепак, семинарот успешно го заклучивме – како што можевме да заклучиме и од забелешките на посетителите искажани во анкетите, семинарот ја постигна својата цел.
Настанот го отвори директорот на ГеоЛИНК Петар Ташковски, кој изнесе важни и клучни моменти за содржината на семинарот, покажа референтни проекти од областа на гео-инжинерството и GIS технологиите и им ја укажа на присутните важноста од користењето електронска пошта преку интересна анегдота „за момчето што барало работа во Microsoft, а сеуште немало своја електронска пошта“*.
☺
* ГеоЛИНК има желба уште повеќе да го популаризира и масовизира користењето на е-поштата во Македoнија и ја воведува е-комуникацијата со своите корисници и странки како најефтин, најбрз и најефикасен начин на комуникација.